general

Iby’ingenzi munama ya 27 ya AU i Kigali

Kigali yahindutse Umurwa Mukuru wa Afurika; abakuru b’ibihugu 35, aba za guverinoma n’intumwa zitandukanye z’ibihugu 54 bigize uyu mugabane bari kubarizwa mu Rwanda.

Nta watungurwa no kuzinduka ajya ku kazi agakubitana na Perezida wa Tchad Idriss Deby, cyangwa se ugahura na Alassane Drahmane Ouattara wa Côte d’Ivoire ari kwinywera icyayi kuri Marriot, kimwe n’uko wakubitana na Ismail Omar Guelleh wa Djibouti ari gukora urugendo rw’amaguru mu gitondo kare Nyarutarama kugirango yirirwane amafu muri iyi nama iri kubera hirya aho kuri Kigali Convention Center.

Mu gihe u Rwanda ruri kwakira abashyitsi benshi icyarimwe kurenza ibindi bihe byose kuva rwakwitwa iri zina, imyiteguro mu kubakira ni yose, dore ko buri mu nyafurika yinjira yisanga agahererwa Visa ku kibuga cy’indege i Kanombe, RwandAir ikora ingendo muri byinshi mu bihugu byo kuri uyu mugabane ibiciro aho kubizamura mu gihe nk’iki yabihanantuye nta kuzuyaza, amahoteli yarubatswe aruzuzwa, imihanda mishya irahangwa, muri macye Kigali iracyeye.

Iyi nama y’Umuryango wa Afurika Yunze Ubumwe yatangijwe tariki ya 10 Nyakanga ikazasozwa tariki 18 izigirwamo byinshi by’ingenzi kuri uyu mugabane wugarijwe n’amakuba menshi ariko kandi ukaba n’uwa mbere mu iterambere.

Iby’ingenzi mu bizakorerwa muri iyi nama biri mu ngeri nyinshi, hano hasi twagize ibyo tubegeranyiriza.

1. Hazatorwa Umuyobozi wa Komisiyo ya AU uzasimbura Nkosazana Dlamini Zuma

Ibihugu bigize AU bigiye gutora umuyobozi uzasimbura Dr Nkosazana Dlamini Zuma w’imyaka 67, Umuyobozi wa Komisiyo ya AU.

Nyuma y’imyaka ine atorewe kuyobora Komisiyo ya AU, Dlamini Zuma ageze ku musozo wa manda ye ariko ntiyongeye kwiyamamariza indi manda n’ubwo amategeko abimwemerera.

Dr Dlamini arahabwa amahirwe menshi yo kuyobora ishyaka riri ku bitegetsi muri Afurika y’Epfo, ANC, bikaba byamuhesha amahirwe yo gusimbura uwahoze ari umugabo we, Perezida Jacob Zuma utorohewe ku buyobozi bwa kiriya gihugu.

Mu bakandida batatu bari guhatanira kuyobora Komisiyo ya AU harimo Minisitiri w’Ububanyi n’Amahanga wa Botswana Dr Pelonomi Venson-Moitoi w’imyaka 64; Dr Specioza Naigaga Wandira Kazibwe wigeze kuba Visi Perezida wa Uganda ubu ufite imyaka 61, na Minisitiri w’Ububanyi n’Amahanga wa Equatorial Guinea, Agapito Mba Mokuy w’imyaka 51.

Mu nama ya ICGLR u Rwanda ruhuriramo n’ibindi bihugu 11 iheruka kubera i Luanda muri Angola muri Kamena uyu mwaka, abakuru b’ibihugu biyemeje gushyigikira Dr Wandira Kazibwe nk’Umukandida w’Akarere k’Ibiyaga Bigari.

Dr Nkosazana Dlamini Zuma yari amaze imyaka ine ayobora Komisiyo ya AU

2. Hazamurikwa Pasiporo Nyafurika

Izwi nka AU e-passport, iha uburenganzira busesuye abayikoresha bwo gukora ingendo batatse visa mu bihugu 54 bigize uyu muryango.

Iyi ni intambwe ikomeye mu nzira iganisha kuri Afurika itagira imipaka, kuko gukuriranaho viza hagati y’ibihugu bizoroshya gukorana ubucuruzi hagati yabyo, bigafatanya n’imishinga inyuranye y’iterambere.

Iyi pasiporo nshya izamurikirwa mu nama ya AU, ku ikubitiro izegenerwa abakuru b’ibihugu, ba minisitiri b’ububanyi n’amahanga n’intumwa z’ibihugu muri AU, bose bakoraniye i Kigali kuva kuri iki cyumweru.

3. Hazasuzumwa uburyo bwo kuzamura ijwi rya Afurika muri Loni

Nubwo ibihugu byo muri Afurika byose biri mu muryango w’Abibumbye, Uyu mugabane nta munyamuryango uhoraho ugira mu kanama ka loni gashinzwe amahoro n’umutekano ku Isi [UN Security Council (UNSC)], kagizwe n’ibihugu 15.

Mu bihugu bitanu birimo mu buryo buhoraho ni u Bushinwa, u Bufaransa, u Burusiya, u Bwongereza na Leta Zunze Ubumwe za Amerika.

Ibihugu 54 bya Afurika byose bihagarariwemo n’ibihugu bibiri nabyo mu buryo budahoraho, uyu mwaka harimo Angola izageza mu mpera za 2016 na Misiri izageza mu 2017.

Ibihugu bitatu muri bitanu bifite uburenganzira buhambaye ku byemezo bikomeye muri Loni cyangwa ‘droit de veto’ bituruka mu Burayi na Amerika, nyamara uko ibyo bihugu bihagaze uyu munsi si ko byari bihagaze ubwo byihaga ubwo burenganzira nyuma y’intambara ya kabiri y’Isi mu 1945.

Ibihugu byinshi byo ku mugabane wa Afurika no hanze yawo bikomeje gusaba ko habaho impinduka zishobora gufatwa nk’izikomeye kurusha izindi mu miyoborere y’Isi.

Afurika niyo ifite ubukungu buri kwihuta cyane, ku buryo bibaye ko ihagararirwa bihoraho muri UNSC, Nigeria ifite ubukungu bukataje n’abaturage basaga miliyoni 187 ishobora kwinjiramo ku ikubitiro, ikagubwa mu ntege na Afurika y’Epfo na Ethiopia.

Amerika y’Epfo nayo ntifite umwanya uhoraho muri UNSC, Brazil ihabwa amahirwe menshi, mu gihe ayo mavugurura akomeje guharanirwa yaba yemejwe.

4. Hazasobanurwa byimbitse Agenda 2063

Ni gahunda yagutse ya AU y’imyaka 50 iri imbere, igamije “kubaka Afurika ishyize hamwe, iteye imbere kandi itekanye, ikarangazwa imbere n’abaturage bayo kandi ikigaragaza nk’igice gikomeye ku rwego mpuzamahanga.”

Agenda 2063 ifatwa nk’uburyo bw’igihe kirekire bwo gufasha Afurika kwihutisha iterambere, binyuze mu kubaka umugabane ufite ibihugu bifungurirana imipaka kandi bikarangwa n’ubumwe.

Ni uburyo kandi buzafasha Afurika guhindura imyumvire n’imitekerereze, ibihugu byayo bigakorera mu mucyo no mu rukundo rwa Afurika n’Abanyafurika.

Uyu ni umwanya mwiza uzifashishwa mu kuyisobanurira Afurika mu buryo bwimbitse.

5. Umuti wo guhangana n’iterabwoba

Ibihugu binyuranye kuri uyu mugabane byugarijwe n’ibibazo by’uruhuri biterwa n’imitwe y’iterabwoba. Kenya yugarijwe na Al Shabaab, Nigeria na Chad zugarijwe na Boko Haram, ndetse ibihugu byo mu Burengerazuba bwa Afurika nabyo ntibyorohewe.

Bisa n’aho imbaraga z’ibihugu ubwabyo zidahagije mu guhashya iyo mitwe, ku buryo hitezwe umuti uhuriweho ubwo kuwa 16 Nyakanga abakuru b’ibihugu bazaba baganira ku mahoro n’umutekano muri Afurika.

Uretse iterabwoba, ibihugu birimo u Burundi byugarijwe n’umutekano muke, u Burasirazuba bwa Repubulika Iharanira Demokarasi ya Congo, Repubulika ya Centrafrique, Somalia, Libya n’ahandi.

Uretse ibyo bihugu bimaze n’imyaka myinshi bibonye ubwigenge, muri Sudani y’Epfo yinjiye muri AU mu 2011 intambara yongeye kurota bundi bushya, ku buryo inama ya AU ishobora kugira uruhare mu gushakisha ituze.

6.Ibihugu bya Afurika bishobora kwivana muri ICC

Bamwe byatangiye bibaza niba Omar Al Bachir azaza i Kigali ntatabwe muri yombi, ariko Perezida Kagame ashimangira ko u Rwanda rutazamufata kuko ari “ICC yabivuze”.

Bashir ushakishwa na ICC kubera ibyaha byibasiye inyokomuntu akekwaho, yatumye Perezida Museveni wa Uganda ubwo yarahiriraga manda ya Gatanu ayobora igihugu avuga ko ICC ari “itsinda ry’abantu badafite icyo bamaze”.

Byitezwe ko umwanzuro w’abaperezida b’ibihugu bya Afurika wo kwivana muri urwo rukiko ushobora gufatirwa i Kigali, aho na Perezida Uhuru Kenyatta wa Kenya warwitabye inshuro nyinshi yiteguye gushyigikira umugambi wa bagenzi be.

Gusa imwe mu miryango iharanira uburenganzira bwa muntu ntiyemeranya n’icyo cyifuzo cy’ibihugu, bakabihuza n’uko uwakora ibyaha atazakurikiranwa.

7. Amahanga yahejwe mu nama AU i Kigali

Abayobozi basanzwe baturuka mu bihugu bikomeye bakunze kwitabira inama za AU, rimwe na rimwe bigafatwa ko bakora icengezamatwara [lobbying] mu guca intege ibyemezo bishobora kubangamira inyungu z’ibihugu byabo.

Inama ya 27 ya AU ifite umwihariko wo kuba nta gihugu cy’amahanga cyatumiwe, uretse ibisanganwe uburenganzira bw’indorerezi birimo birimo Palestine, Turikiya, Haiti, Serbia na Ukraine.

Israel nayo ikomeje gusaba ubwo burenganzira ndetse amahirwe menshi ni uko ishobora kubuhabwa. Mu Ruzinduko Minisitiri w’Intebe wa Israel, Benjamin Netanyahu aherukamo mu Rwanda, Uganda, Kenya na Ethiopie, Minisitiri w’Intebe wa Ethiopie Hailemariam Desalegn, yavuze ko “Israel iri gukora cyane mu bihugu binyuranye bya Afurika, nta mpamvu n’imwe Israel yakwima ubwo burenganzira.”

Perezida Uhuru Kenyatta wa Kenya na we yagaragaje ko yiteguye gushyigikira ubwo busabe. Israel yari isanganywe uwo mwanya hakiriho OUA, havutse AU mu 2002 birangira ubwo.

Abakuru b’Ibihugu bagera kuri 35 bategerejwe muri iyi nama

Ni inama izemerezwamo imishinga itandukanye igamije iterambere rya Afurika