min21

PDI yongeye gushimangira ko Perezida Kagame ashoboye ibibazo by’u Rwanda

Ishyaka Ntangarugero muri Demokarasi (PDI) risanga u Rwanda rumaze gutera imbere kubera imiyoborere myiza, gukomeza muri uwo murongo bikaba bisaba gusigasirwa n’umuyobozi ubifitiye ubushobozi.
Mu kiganiro n’Abanyamakuru, umuyobozi mukuru w’ishyaka PDI akaba na Minisitiri w’Umutekano mu gihugu Sheihk Harerimana Musa Fazil yabajijwe umuyobozi iri shyaka ribona ari kamara mu gihugu.
Hari nyuma yo kubabwira ko iri shyaka risanga ingingo ya 101 mu Itegeko Nshinga ikwiye guhinduka, umuyobozi (…)

Ishyaka Ntangarugero muri Demokarasi (PDI) risanga u Rwanda rumaze gutera imbere kubera imiyoborere myiza, gukomeza muri uwo murongo bikaba bisaba gusigasirwa n’umuyobozi ubifitiye ubushobozi.

Mu kiganiro n’Abanyamakuru, umuyobozi mukuru w’ishyaka PDI akaba na Minisitiri w’Umutekano mu gihugu Sheihk Harerimana Musa Fazil yabajijwe umuyobozi iri shyaka ribona ari kamara mu gihugu.

Hari nyuma yo kubabwira ko iri shyaka risanga ingingo ya 101 mu Itegeko Nshinga ikwiye guhinduka, umuyobozi Abanyarwanda bifuza agakomeza kubayobora.

Fazil yahise avuga ko PDI isanga Perezida Paul Kagame ari umuyobozi ukomeye wagejeje u Rwanda kuri byinshi wanabikomeza ku buryo nta wundi wamugereranya nawe, yanavuze ko ari ‘kamara’.

Yagize ati “Hari Abanyarwanda benshi baba Abaperezida, buriya za Somalia zifite ba Perezida, Perezida ufite ibendera, maze abantu bagakubita fanfar agashyiraho guverinoma, aho ba Perezida barahari nta gihugu wasanga kitabona Perezida, ariko Perezida ukwiye mu bihe abantu barimo abo baba bakeya, ku Isi baba bake.”

Uyu muyobozi wa PDI yakomeje avuga ko u Rwanda rufite umubyeyi w’igihugu, wakuye igihugu mu bihe bibi bikomeye akarugira igihugu gitekanye.

Ati ”Hariho Abaperezida bitwa ababyeyi b’igihugu (Pere de la Nation, Father of the nation, Baba wa Taifa) akaza agashyiraho gahunda zituma igihugu kiba kimwe, akagiha imirongo kigenderaho, abandi bakaza gusa bashyira ibirungo kuri iyo sisiteme.”

Ishyaka PDI naryo risanga mu Rwanda uwo muyobozi ahari nkuko Fazil yakomeje abivuga.

Ati ”Uwo Muperezida niwe dufite. Naho Abaperezida baza bagasanga sisiteme ziriho, bakaziyobora manda ikarangira bagasimburwa n’abandi, abo ngabo ku Isi yose baraboneka, abo barahari rwose ni benshi.”

Yatanze urugero rw’Abaperezida mu bihugu byabo bageze ku rwego rwo kwitwa umubyeyi w’igihugu. Harimo Nelson Mandela, George Washington, Abraham Lincoln na Julius Nyerere.

Ahereye kuri izi ngero, yagize ati ”Natwe rero Nyakubahwa Paul Kagame ntiwamugereranya n’abandi bazamusimbura, abongabo baza ari umuntu umwe mu kinyejana, cyangwa muri bibiri.”

Fazil na PDI basanga igihugu cyarageze kuri byinshi, ariko kigikeneye imbaraga z’uwo mubyeyi w’igihugu ngo kigere ku rwego rwisumbuyeho.

Ati ”Muri situation turimo ni kamara, kugira ngo ugende utinyuke abajenerali ubabwire uti ayo masambu mwafashe nimuyagarure, muyagabane n’abaturage ntabwo ari buri wese wagenda akababwira atyo.”

Nta wundi kandi ngo wapfa kwinjira muri banki harimo n’izikomeye ngo asange abayobozi barigurije amafaranga mu buryo budakwiye nkuko byabaye, maze ngo abibereke batangire gusaba imbabazi.

Ati ”Si buri wese utinyuka abamaze kugera mu ntera ku mafaranga no mu mapeti.”

Gukora ibyo byose ngo ni umusingi arimo kubakira Abanyarwanda ngo n’abandi bayobozi b’igihugu bazaza nyuma bazatinyuke bahereye ku rugero rwe.

Mu ngero nyinshi Fazil yatanze, yagarutse no ku rw’umwe mu bajenerali bo mu ngabo z’u Rwanda wasobanuye uburyo ingabo zahoze ari iza FPR Inkotanyi zari zigiye gutsindwa urugamba rwo kubohora igihugu ariko zikagobokwa.

“(Kanaka) avuga ngo Rwigema amaze gupfa abantu baratatanye bamwe batangira kwisubirira Uganda, abandi batangira kwica umusubizo n’ingabo za Habyarimana. (Kagame) ava ku ishuri araza arongera abashyira hamwe urugamba rutangira bundi bushya, ararukomeza bararutsinda.”

Ahereye aho ati ”Niba atari kamara kuki nta bandi bashyizeho, ko Kayumba yari ahari kuki ataje bavuga ngo tuyobore, cyangwa se runaka?” Kuki bamutumyeho huti huti akaza, nuko bamubonye ko ari kamara.”

moussa faziriKu bahunze igihugu babaye mu ngabo za RDF, Fazil yarababajije ati “Igihe cy’urusasu babonye ko ari kamara uyu munsi nibwo babona ko atari kamara? Urusasu ntiruza nyine kuko yarushyiriyeho ingamba zituma rutaza.”
Ese urugamba ruracyakomeza?

PDI yemeza ko mu Rwanda hakiri urugamba rwa ba rusahurira mu nduru bakwiye gukomeza kurindwa kwugwizaho ibyavuye mu byuya by’Abanyarwanda.

“Ikibazo dufite ni iki, ese ya misingi amaze kuyigeza aho agomba kuyigeza ku buryo n’abandi bafatiraho, cyangwa se imisingi iracyamukeneye? Twebwe muri PDI tubona ko iyo misingi itaragera aho yakagombye. Hari ibirura bikiri aho ngaho, hari abantu usanga bizewe, icyizere bagiriwe ugasanga bakibagiriye babareba ku maso ariko batari bazi ko bagifite ibintu by’ingengabitekerezo, by’amacakubiri n’iby’ubujura.”

Mu gihe rero abo bantu bagihari ”Twamuretse agakomeza akubaka sisiteme zibatahura? agasigira ibyoroshye abakurikiraho.”

Iti “Aho niho PDI duhagaze, turacyabona ibirura, abantu bacengacenga, turacyabona ubukungu bukeneye gukomera.”

Wa muyobozi iri shyaka ribona agishoboye kurenza abandi ngo aracyakomeye kandi ngo arangwa n’ibitekerezo bishya agitanga, n’udushya twinshi ku buryo ngo igihe “bizaba byamushiranye icyo gihe, tuzavuga tuti imisingi yamaze kuzura.